錦田山田錦，急口令咩? 🤣 有時都會聽到有人問，sake係用咩釀㗎？山田錦是什麼？山田錦係咪一個牌子？點解山田錦前面有時會寫「全量山田錦使用」，有時會標明「兵庫縣山田錦」，有d sake又會寫「東條特A山田錦」?
日本人做事嚴謹就出晒名了，從包裝到label都好講究。對於日本sake，米酒米酒，米梗係重要既原材料之一啦！現代釀酒用的日本米稱為「酒造好適米」，一般都係來自各個縣，從米農度收成嘅酒造好適米，價錢比普通食用米貴好多，而貴中之貴就係「山田錦」。所以酒標上寫明「山田錦全量使用」，可能有一部份係爲了show off（除非唔係😜）。今次我地講下香港有米的故事！👍🏻
如果有睇開WineNow嘅朋友，可能睇過小編之前關於大嶺酒造嘅報導，小編去到酒造果刻先見到一塊綠油油嘅米田，種緊用來釀三粒米嘅山田錦。今次正了，唔洗去到日本咁遠了，香港有一塊山田錦米田，終於有港產酒造好適米 – 錦田山田綿。
香港第一
第一款用港產山田錦釀嘅清酒來自一間本土酒造，嚴格來說其實唔算日本酒或者sake，只能算係米酒，不過我地暫時貪個便宜叫佢清酒先。主創團隊從2017 年開始嘗試以不同米種種植，最終在 2020 年成立「香港酒造」，並在大帽山租下超過 20,000 呎的農地，從日本朋友手上買下山田錦、五百萬石及雄町等日本米的種子，經過一番努力，歷時超過18個月，終於成功在香港第一次種出酒米之王「山田錦」。
「沈清」清酒除了第一次使用全量香港種植的「山田錦」，仲注入另一個香港元素：奇楠沉香。為了推動港日融合與釀酒技術的交流，香港酒造搵到日本靜岡縣的「花の舞酒造」合作，從研發到生產，歷時長達一年，終於‘’煉成‘’成第一支「香港農作x日本製造」的清酒「沈清」。
香港特色
除了本土種的酒米，主創團隊仲同「花の舞酒造」研究，是否可以加入一些代表香港的味道與情懷的元素？作為香港酒造第一擊，香港酒造特意在「沈清」中加入香港最古老的味道，沉香中的極品——奇楠沉香。
早從十五世紀明朝開始，香港南部已經是轉運香料的集散中轉港口，加上香港當時盛產莞香（即土沉香），製成香料後，經石排灣（即現時香港仔附近）運銷往世界各地，甚至被列為進貢皇帝的貢品，因此當時香港不少人亦以香料為主業，造就了制香、運香業的盛況等，因此石排灣得名「香港」（香的港口），此名漸漸延伸至整個小島 ， 從此「香港」叫「香港」。
比較一般沉香，奇楠沉香更是價值連城。它的木味香濃，更悠長持久，但因為數量珍稀，價格昂貴，而家香港更加少見。加入奇楠沉香呢個構思，係主創團隊為了賦予「沉清」一份別樣意義和代表性，讓大家在品嚐嘅同時，感受到百年前香港仍為漁港及交易港時的古樸純粹的味道。
香港務農
其實小編一開始聽到有人在香港種山田錦嘅時候，心想：serious？玩咩？
後來聽到創辦人介紹咗佢哋嘅理念之後，開始理解到「香港酒造」的願景。曾任品牌顧問及市場總監的 Tom 跟拍檔 Nick ，過去曾經跟不同的超市及大量店鋪合作，經過不同途徑認識到本地農業的市場及生態，了解到其艱辛與魅力，加上本身熱愛品嚐清酒，慢慢萌生了將本地農作物融入清酒的念頭。
在追求將香港風味融入清酒之外，「香港酒造」亦重視農業生態，
一個字頭的誕生
經過主創團隊介紹，今次係「香港酒造」第一代推出市場的釀造酒產品。概念的開發、設計、實施由「香港酒造」出發，釀造過程由花の舞酒造主導。定好發展方向後就可以烘烘烈烈大幹一場？講就簡單，實際操作中遇到各種問題(下刪2000字…）
其中，加入沉香嘅比例同工藝，已經需要多次反覆試驗，從實驗品001開始試到00X，最後得出兩款大家相對滿意的作品，就係而家大家睇到的「謙」(Him) & 「可」(Her)。
兩款口味有比較明顯的分別，每款限量各 500 支。創辦人Tom同我哋講，當時試酒後進行投票，得票最多嘅兩款，一款多男士投，取其謙虛之意；另一款就最多女士投票，取其可愛之感，結果就擺在大家眼前啦！
酒標上的logo圖案同毛筆字係出自Tom屋企長輩，logo其實係一條魚加一支稻穗🌾
同樣使用港產山田錦與9號酵母，精米步合60%，酒精度15.5%，雖然規格上差不多，但口味好唔同。
「謙」(Him)
剛開瓶，「謙」嘅香氣比較subtle，nutty的香氣（準確d講應該係沉香既氣味）一開始包裹得比較實，比較傳統嘅口味，隨住時間變化慢慢釋放，酸度亦在變化，可能屬於慢熱型，需要d時間去了解佢。可以試下常溫下飲用，或配上粵菜，都有唔同表現。
「可」(Her)
「可」的沉香的氣息一倒落杯已經散發出來，入口相對清爽，口感柔順，酸度平衡，確實適應性更高。適合微冷品飲，保持宜人香氣同輕快口感。
小編作為一位“可愛”型選手（一聽就知唔謙虛)，個人反而比較喜歡「謙」，分幾日試飲，有唔同感受，飲落比「可」更多層次同變化，唔係一支輕鬆飲嘅酒。坦白講，兩支酒雖然唔算「花の舞酒造」最高水平，但作為一間start up本土酒造，用心經營出的一支“港日混血兒”，仲有可期待的進步空間。
目前大家可以通過香港酒造網址購買(https://yuedobrewery.com/our-product/)，「謙」與「可」劃一價$480 (720ml)。
仲有一set特別限量套裝：一套【謙 | 可】各一支，裡面仲有一包錦田山田錦玄米同珍貴嘅奇楠沉香，俾你親自觸碰同聞到原材料。配埋一套精緻嘅清酒壺同對杯，一共187套（*由山田錦種子第一次於香港浸泡露白的瞬間，再成熟收割的過程 一共需時187日），訂完就無啦！小朋友先要揀，大人肯定要晒兩支！
之前WineNow嘅omakase dinner都有開一套俾VIP客人試飲，大家都話好特別，加上咁有誠意嘅本地種植山田錦，真係飲一套少一套，撐土炮嘅同時可以期待一下「香港酒造」下次會釀d咩，容許我哋賣個關子先，不久的將來會爲大家發布新動向！
「香港酒造」做了“第一個食螃蟹的人”，利用香港有機水土耕種出第一批日本酒造好適米。旨在發掘本土農業可行性，及推動香港農業造酒文化，創造多一個令香港人感到自豪嘅產業！
