Too many ways to be number one

閨閣芝蘭 許鞍華

Ann，生日快樂！考第一可以有無限的理解，夠膽講就有人夠膽認，冇攞過奧斯卡又如何，但貴位全球首位第77屆威尼斯終身成就金獅女導演，女權主義抬頭根本就不是議題，你攞到六屆金像導演獎，無需理佢係男定女。一個字頭的誕生不容易，浪跡天地，從沒埋堆，而不被埋沒，是奇蹟，可以的話，請不要停下來，繼續好好拍電影。

Below The Lion Rock

獅子山下尖子，當年走得甩嘅就Prince Philip獎學金去劍橋，逼住留喺香港考第一嗰啲就做King Edward VII Scholar，兩樣都冇，就愛丁堡獎勵計劃金銀銅橙也不賴，光環加冕吧…..嫁唔到俾哈里王子，都有事頭婆英皇御准Buckingham Palace Gin可以虛擬感受皇室花園的味道。

The Golden Era

某新成立機構剛剛十周年就打入全球十大，十下十下，當然人人喜氣洋洋，對家溫馨的祝賀期待你們二十周年的慶典，酸過七月葡萄。沉醉於Nostalgia並非原罪，但如果對過去感到迷惘，對未來又充滿不安，就活在當下吧。Henri Jayer也好，Jacky Truchot也罷，時候到了，還是要放手，行山完畢high high地齊齊Low Tea。

Boat people: The Romance of Book and Sword

人人打開本書都識，一窩蜂去釀酒酒。香港造酒當然唔使攞HKCAAVQ，門檻任開。但通才永遠如鳳毛麟角，熱血加心力交瘁≠有成績，香過香香公主都冇用，現實世界處處講認受性。Saint-Emilion酒莊參加審查的費用漲得快過樓市，2006年報名費只是1,500歐元，剛受理的2022年分級審查，已是14,000歐元(頂級Premier Grand Cru classé 更要21,000歐元)。既然經營酒莊是要花大錢才賺小錢，升斗森朱最緊要有得返Batard叫三黃雞嘆fine wines的浪漫。

A Simple Life

可能佢嗰係有桃味嘅台灣金鑽鳳梨菠蘿包，你話佢食相唔靚？佢其實瀟灑有型到不得了。各位朋友，你們不是Ann姐，所以酒過三巡，小心俾人偷影，否則名媛印象一朝喪。

Summer Snow in July Rhapsody

男女四十不惑後可以做什麼？講起Now and ViuTV，你會唔會諗起李嘉誠？所以講起Pegau，你只會諗起阿女Laurence。講開又講2016 da Capo史上最差記錄，「只得」99 分，唔使喊，可能只因龍門搬咗。

Visible Secret

中國文化源遠流長，但有啲嘢真係冇得認叻，兩個姨甥女剛啱啱生BB，一個鬼妹一個唐人，餵奶時候就天與地分別。講遠少少爆紅常用秘技是一脫成名及改名，但唔係個個好似李麗珍改名再改名再著返衫能攞金馬獎最佳女主角，當然又係導演功不可沒。姓名學眾多門派，如果真係人多好辦事，Penfolds 「奔富」夠改名改得好啦，有啲事又真係睇唔穿猜不到會發生。

The Postmodern Life of My Aunt

二姨媽說她是窮人，退休後平時嗜好是同各大上市公司主席CEO良朋共聚，每次食飯大家要攞一支好好飲嘅酒，但係要鬥平！附圖就是其中一次的勝利者，盛惠港幣五十，難怪她不會給人騙走二億五千萬，但如果人人似佢，酒吧重新開門都冇用。

Starry is the Night

大學生食煙講粗口唔係犯法唔使拉喎，不過又真係唔夠優雅，學下師姐，在陸佑堂飲醉酒背誦莎士比亞(牡丹亭都得)，唔係打交博懵，呢啲就係境界，雖然就算有冇疫情都唔係周圍都有酒飲。

Love after Love

Wikipedia都有大導介紹：文學改編、武俠巨著、半自傳體、女性議題、社會現象、政治變遷、以至驚慄電影。作品反應時代，充滿不安張力，角色常在夾縫掙扎求存，最後往往被社會家庭背叛。Ann Hui多才多藝，係唔識賺錢，唔似得激進改革派代表Elio Altare將揚名立萬的小木桶Barolo交托女兒Sylvia之後，再往Liguria尋第二春製造圖中的自然酒類項目………

Night and Fog during The Way We Are

又係一年一度Bordeaux En Primeur，還原基本步都是睇天氣講技術鬥心機，艱難時期，澆水點蠟燭全部都係燒銀紙。數錢的話，不如也月旦咖啡，期貨貿易額度遠超紅酒。其實好似中醫寒熟溫涼屬性理論，各有所求所愛啫。隔離枱醉人醉語：唔知係咪葡萄愛層皮，但係咖啡就最緊要粒核，所以酒友係要面子而咖啡友就講尊嚴，嘩，呢幾句真係……天地人，談天講地無需要得罪地球一半人口  。

Song of the Exile

沈從文過身太早，看不到陳冠中的盛世三部曲，當然越南三部曲也有緣無份，但與諾貝爾獎擦身而過又何干，窄而霉齋或客途秋恨，都像美好的貴腐酒千古稱頌流傳後世。

Love in a Fallen City for Eighteen Springs

龍虎山並無龍虎武師，但龍蝦灣就是香港唯一武林勝地，鳳凰山天門棧道就係峨眉仙境，有時淨係聽名銜講派頭很易中伏。培養青年人長大，就好像每年的收成，自吹自擂並無作用，要出盡八寶當永遠冇下次機會重拍，就算未必次次最好但肯定見得到傾盡全力。過去是回不去了，低潮過後就必有一番體會。世界上並沒有差的子女，他們只是各有性格特點，若果歸咎於年份渣也可能要懇請個別長輩自省。

Our Time Will Come

Hong Kong Club把酒問青天吃C教授提早退休散班飯時聽他自爆，當年佢聽老婆分析“His best is outstanding; his second best is not good enough. ”，所以小注怡情，起初Cash Bitcoin比例係四比一，現在已經一比四百，作為後輩當然唔希望佢香港天線變香港痴線。錢銀事少，教授太臨別贈言才是真知灼見，重點唔係升幾多，而是你可唔可以在花花世界不離不棄拖住伴侶一生一世。

The Common Sense – As Time Goes By

如果相信氣泡裡一個快樂的珠璣傳說，就算去日苦多，終結也是甜美鏗鏘的。牡丹亭上三生路，曲終人不散。